صندوق الاقتراع
صندوق بُنِي قديم
مافيهوش ولا شيء سليم
حتى القفل المصدِي
ولسان معووج لئيم
وعليه كتابة باهتة
أولها جيم وميم
والعين ممسوحة خالص
مش فارقة ... حرف ناقص
ما الكلمة ضايعة أصلاً
والأمة في السديم
***
صندوق مسكين ولكن
له سلطان عالمساكن
وكل الساكنين
الصَوْلَجَان في حِجْرُه
واسم الحاكم بأمرُه
ومصير المحكومين
جواه أحلام كتيرة
والعصفورة الأسيرة
بعد أمَّا سَجَنها عُمرُه
بكرة تبان عالجبين
هو ملك الكراسي
والمرسوم الرئاسي
من بين أوراقه يطلع
بميلاد أو موت مبين
***
صندوق الاقتراع
قديم مش اختراع
موجود من ألف عام
وإحنا زي النعام
مغمّضين عيوننا
وبنشكي من الظلام
ياما شاف عجب العُجاب
وتاريخ مالهوش كتاب
ما بين غشاش بيكسب
في يوم الانتخاب
وأصوات بجْنِيه بتطلع
وأصوات بالضرب تُمنع
ومظاهرات السُباب
ومظاهرات الامتِنَاع
وهو برضه ساكت
صندوق الاقتراع
***
والناس غلابة موت
مش عارفين الحكاية
بيروحوا يدوا صوت
"نعم" زي الروبوت
وما فيش أبداً "كفاية"
***
والصندوق العجيب
مالهوش في الحكمة لون
ولا ليه في الكون أمان
فساعات بيجيب شارون
أو غاندي أو أنان
والسر ضلمة كالحة
في الشعرية ومصيلحة
ما هه كله في كفة واحدة
والغلطة في الميزان
***
صندوق اليانصيب
وصندوق المسابقة
ونفسي يامصر يبقى
الكسبان من ولادك
أصحاب القلب صافي
والكلمة حق صادقة
والوعد أصيل وكافي
مش بس كلام وصَدَقة
ونفسي يا صندوقي تبقى
حقيقة مش خداع
وساعتها تبقى حقه
صندوق الاقتراع
2 comments:
من كام يوم قريت كلام رامى عنك و ماكانش عندى وقت أشوف البلوج بتاعك و النهاردة قريت أخر تدوينات رامى عند علاء و منال و توقعت أن غاندى هو حضرتك و برضه مابصيتش على البلوج و دلوقتى لقيت صورتك منورة فيا سى غاندى بما إنك مدون قديم يبقى حمدالله على السلامة فى التدوين ،لكن رامى حطك فى ورطة كبيرة لأننا هنستنى منك كتير ،فى إنتظار أن نقرأك كما تقول..بالمناسبة إيه الصور الجامدة دى يا باش مهندس؟
أولاً الله يسلمك، وثانياً أنا شخصياً مش مستني من نفسي أكتر من إني أحاول بجد، علشان الحياة ترجع تبقى ملونة، ومن بعدها تيجي في الأولوية المدونة
Post a Comment